Bursaraidh Teagaisg a-nis a’ gabhail a-steach cuspairean

Gheibh daoine a tha ag iarraidh ath-thrèanadh mar thidsearan Gàidhlig ann am foghlam bun-sgoile agus àrd-sgoile a-nis buannachd bhon sgeama Bursaraidh Teagaisg.

Chaidh an sgeama fhosgladh air a’ mhìos a chaidh le Leasachadh Sgilean na h-Alba (SDS) gus barrachd dhaoine a bhrosnachadh a bhith ag ath-thrèanadh mar thidsearan anns na cuspairean as motha air a bheil iarrtas, agus tha e a-nis a’ toirt a-steach Gàidhlig còmhla ri cuspairean STEM.

Tha am bursaraidh £20,000 ri fhaighinn do dhaoine a tha ag atharrachadh dreuchd anns an ath bhliadhna acadaimigich fhad ’s a bhios iad ag ionnsachadh airson PGDE anns na cuspairean iomchaidh.

Tha Bòrd na Gàidhlig, a’ bhuidheann phoblach le uallach airson leasachadh na Gàidhlig ann an Alba, air fàilte a chur air a’ chànan a bhith am measg nan cuspairean a gheibh buannachd bhon taic.

Thuirt Iain Mac a’ Mhaoilein, Stiùiriche Leasachaidh, Bòrd na Gàidhlig: “Tha Foghlam tro Mheadhan na Gàidhlig na phrìomh bhunait de leasachadh na Gàidhlig agus tha àrdachadh san àireimh dhaoine a tha ag ionnsachadh na Gàidhlig na phrìomhachas ann am Plana Nàiseanta na Gàidhlig.

"Tha e air leth feumail gum bi an leithid de thaic ann do dhaoine a tha airson a bhith nan tidsearan Gàidhlig.”